日常自由聯想
記於2022.4.12.
前排去咗睇自己有既眼影同腮紅色。真係唔係太理想。首先係無安全款，另一個問題係腮紅隻粉真係太可怕，勁螢光，唔係太啱用。即刻就想買返啲新既普通既眼影。唔駛太大既，但係又乜都齊全咁，可能大地色然後又可以做鼻影，咁如果想要特別紅色或橙色先再買其他四色。未買已經諗掉拾離，因為隻腮紅真係可怕，另外唔明點解咁多人都會係咁買化妝品。我覺得無乜必要？
我唔覺得要咁多盤眼影同唇膏或者衫。雖然好似係要試得多先會揾到啱，但係就會令我諗起嗰啲為咗靚同啱所生成既廢物。打扮得好睇既呢一件衫背後又有幾多件衫？現代化妝品產業就係咁樣，根本係買新既平過去整，什至根本無人試過用哂一盤眼影、一枝唇膏。到底嗰啲係裝飾定係用品？會因包裝而買既又係咩一回事？如果真係咁鍾意包裝而唔係內容物，點解唔去揀二手嚟買？反正只係一個裝飾。講到用到見鐡片已經好勁，用好耐就已經要掉。咁其實點解要整咁撚大盤野？咁撚大枝唇膏？如果係因為包裝咁樣會平啲，咁點解唔整細啲個包裝，等大家真係可以用完啲野去然後再買新？係唔係呢個用完再買既消費模式太合理，唔適合喺資本主義下運行？只可以買一大堆野，根本無暇使用。見到新一季出咗啲新品又買，來來回回根本就用唔哂。
#useupcometics campaign有無得諗？如果把掉捨離演繹成高效生活，或者極簡本身係追求效率，咁用撚哂啲化妝品就係反資本主義既消費模式。我已經完全脫離環保或者浪費咁去思考呢個話題，（因為談及浪費就要對應意義，而我並唔肯定環境同人有無意義，唔需要喺呢度講）唔止係化妝品，其他生活用品點解要囤積？點解喺香港呢個咁方便既地方要儲糧同水？我地空間好大？點解買唇膏好用就要包色？到底點解乾粉類化妝品會有使用限期？佢係邊一隻有效成份會過期會氧化？我都識啲化學，可唔可以話俾我知？乾粉類本身係唔係有加到perservatives而佢係會喺三年內氧化變質？如果唔係，係唔係有效使用期限只係俾一個理由人去掉野？因為如果無理由去掉野既話，嗰啲完全用唔哂既化妝品就會堆積埋一齊，堆到一個位係唔可能再買，已經放唔落任何野，咁就又令到人唔去購物啦？如果係，咁有效限期就又變成消費主義既工具啦？我終於都明點解pure science is called PURE science，因為呢堆人真好單純，過期就係有部份／全部成份變質至不適合人體／動物，會造成身體傷害既話咪叫佢做過期。科學出身同諗呢啲期限既人從來無諗過要俾社會同商業市場耍，都唔知道咁平凡友善既諗法會被市場挪用。事實係有效限期真係鼓勵人掉野，清空個地方又可以買新野，又可以包色。然後周而復始，好似一般消費主義看待人咁，只係一個金錢既載體，咁屋企就係化妝品既載體，啲化妝品流轉又流轉，唔知做乜鳩咁樣掉完又買，同生活一樣都唔知有乜意義。
另外好好笑既一點係除咗有效限期之外，連「斷捨離」都成為咗消費主義既工具。同樣係俾一個理由人去掉野，去清空空間。用一個比較高貴同文雅既字眼去避開「掉」呢個指示住浪費既字眼。
「我會把這個斷捨離掉」
其實係話「我唔鍾意呢個了」、「呢隻色太舊了我會掉咗去」。有新名都係一件好事，因為「掉」實在太敏感，好似隨手一放，唔撚在意咁拋棄，作為遮醜布都算係唔錯。咩叫有效斷拾離？咩叫掉野？係唔係我地躲避咗呢個令人唔舒服既字眼就可以心安理得咁隨手掉？
兩者分別對我嚟講係最後到底有無insight，有無喺見到咁撚多未開過、開咗用咗一次、包色但無用過既化妝品之中，或者無一盤眼影、化妝品用得哂既情況之下，發現自己其實係幾咁浪費，見到自己不合情理既消費模式。推進一步再去正視自己既需要，係唔係可以試吓用哂啲野先去買，用咗一枝唇膏試到清清楚楚先去試其他。斷捨離對我嚟講並唔係推向極簡主義，唔係講乜撚野空間多咗、或者因為得返好小物品而變得高效率（例如枱面少咗野而容易揾野，無乜衫揀而節省襯衫時間）。掉捨離係必定不適，見浪費而變得不浪費、係抗衡資本主義下既消費主義、係唔撚再俾新一季同包裝迷惑，轉而把眼光由商品放返落自己度。我係咁諗。
當然造成呢種風氣既並不只係消費者，更多係廠商要生產，要賣野要揾錢先可以生存到。但仍然解釋唔到點解要整咁撚大盤眼影，點解唔可以每隻色整薄薄一層，用十次八次就用完，然後覺得啱再買「啱用裝」？係唔係就係同包裝既角力？因為咁樣包裝成本就會高咗，整得柒既又無人要買？如果「啱用裝」先係靚包裝又點睇？呢種「啱用裝」係指而家市面上一般化妝品既容量。最終都係回歸消費者點去理解貨品，如果試用必定係第一步，係唔係就可以令人習慣用完先買？畢竟掉野掉得最安心理得既理由就係啲野已經用完。
2023.4.15.
Cover photo 記第一次用完一樣化妝品
Comments