痾尿與廁所
無數次急到就瀨但必需排長龍既經驗除咗訓練咗忍耐力以外，更多係喺排隊時反思既女廁文化、係因為乜野我必需要企喺度等痾尿。明明痾尿本身只係一件簡單到不得了既事，心理上係不再忍耐、容許自己不需要既體液排出體外；行為上就只係括約肌放鬆、逼尿肌收縮，連諗都唔駛諗既事，只係單單依動物天性而行。痾尿本身既然只係咁簡單既事，點解我要喺希慎一樓等十幾分鐘、要忍耐、要違反動物天性？因為文明既其中一個體現係私隱同理性。文明就係以理性反抗動物天性，讓人類必需忍耐以符合秩序；以私隱為名禁制公開展示部份動物性行為，所以裸體、做愛，排洩都必需喺私人空間進行。所以我每數次忍尿所等待既，唔係「痾尿」呢個行為，而係「私人空間」呢個場所，呢個喺公共空間絕無僅有既私領域、係喺文明既前題下痾尿既許可。
（仲有被教導的身體既故事，後續）
女廁文化
出街不難發現只有女廁要排隊，只有女性眼見廁所就喺眼前但無位，所以必需忍耐先能夠取得痾尿既許可。到底係因為乜野女廁要排隊？我並唔係想探討男女廁格數或者空間分配、兩性痾尿許可不均之類既事。我想講既係，到底喺個廁格入面做咗乜先會花咁多時間、令到女性必需排隊先用到女廁（女性不必排隊便可使用男廁），而作為日常排隊既女性又應該點去回應呢啲女廁隊伍。首先，女性喺廁格入面除咗痾尿，更多係準備痾尿。與使用座廁/痾尿並非完全相關，例如換M巾或痾屎等，就不在討論範圍。喺用座廁既一般情況下，女性行入廁格後只有兩個選擇：一，唔理廁板上既任何尿漬同污漬扎馬凌空痾；二，用廁紙清理廁板上既尿漬同污漬，再決定要唔要坐底痾。當然仲有一個情況係廁格、廁板都乾淨到不得了，根本唔需要清理任何野就會想放心坐底痾*。
入到廁格唔理任何野、唔抺呢樣嗰樣當然係花費最少時間、讓人龍郁得最快，但隨之而來既除咗係痾濕自己以外，更會令廁板/廁格更加污糟，讓之後既用家花更多時間清理，非長遠之計。尤其係下手用家會清楚睇到邊個用完個廁格，然後從廁板既乾淨程度推斷上手用家既人品，整個過程就係不折不扣既批判。我經常會喺入到啲烏喱馬扠既廁格或者見到廁板上無數尿漬既時候，以足夠讓外頭既人聽到既聲線抱怨：「識唔識痾尿㗎」，上手/上上手/上N手真係唔識痾尿㗎咩，佢唔係唔識痾，而唔識得女廁痾尿既禮儀。所謂禮儀就係讓下手用家放心痾*。為咗體現文明、遵守廁所禮儀，進入廁格既人幾乎只可以選擇清理廁板。正正係因為知道上手用完既慘況，幫手清理過後既呢個用家有權選擇坐唔坐底痾，前題係佢就算痾得差都會自己清理返俾下手，唯一既問題係花時間：花時間清理上手污漬、痾尿、再清理自己污漬，然後先沖廁。結果令人龍又長咗，排隊時間又耐咗。等待既人等耐咗，輪到自己既時侯自然會產生一種「唔好輸蝕」既心態：既然等咁耐，點解唔痾耐啲？與金鐘車廂內的人同理，佢地就係女廁廁格內的人，曾經都係排女廁的人，對排女廁既人充滿憐憫。角色互換後又可能因排得耐而用更耐，再度加長排隊時間。
可能有人會話廁所/廁格/廁板既乾淨程度係取決於清潔人手是否足夠、係咪能夠系統性咁提供放心痾既廁所俾用家。但喺一個流轉率高既廁所，清潔人手似乎都只會加長人龍、因為佢花時間清潔過後，如果有不懂女廁禮儀既人痾污糟咗個廁所，都只會維持先前既情況。下一個人依然要選擇清理或不清理，來來回回反而更花時間。所以，到底係點樣可以系統性咁提供放心痾既廁所俾女性、減低排隊時間、容許急尿既人痾尿？
女廁禮儀
Exchange當時要喺瑞士轉機，好多同機既人都會襯空檔去廁所，所以附近既女廁好自然就要排長龍。輪到我嗰時抱住要清理廁板既決心行入廁格，發現廁板已經好乾淨，至少沒有一點污糟需要我去清理，習慣使然下都簡單抺咗廁板先坐上去。發現廁板係暖和、好明顯上手係坐住痾。我當時覺得感受到他人殘留既體温有啲嘔心，但我回望呢個係廁板乾淨既最佳證明（假設佢屎忽係乾淨）。
直到我因為要排女廁、急到必須思考「女廁點解需要排隊」去轉移專注力既時侯先發現，要使女廁廁格使用時間減低最重要既就係提供一個「令人放心痾既廁所」*。提供者除咗係廁所管理者以外，更多係每一個用家。因為每一次用完廁格最直接提供呢個廁格俾下一手既，就係呢個剛使用完既用家，而唔係廁所管理者。如同John Rawls既無知之幕一般，正因為我地無法得知自己會唔會係下一個使用廁格既人（出門在外總係要痾尿的），為咗確保我地都能使用「令人放心痾既廁所」，女廁使用者最好遵守女廁禮儀，為下手用家帶來「令人放心痾既廁所」。
咁實際上要做乜野先叫做遵守女廁禮儀呢？就係唔好整到個廁板/廁格污糟哂囉屌你。如果真係唔小心整污糟咗，咁至少都抺乾淨，令下手喺最低程度下感到安心，可以用最少既effort清理廁板。因為呢個行為正正就係使每一個女廁用家感到安心、以最少既effort清理廁板。繼而減少留喺廁格既時間、減少排隊人龍同時間，容許每個急尿既人都能夠依天性痾尿。
後記/
好一段時間無出文，有更多時間諗東諗西都唔打文。每一次急尿排隊都不斷諗，對用廁格既人不斷批判，然後痾完又無咗回事，今次嘗試打出嚟推廣女廁禮儀（笑）。希望廣大女廁使用者建立廁所品德。2023年出文唔多，私下都收埋好幾篇唔知出唔出好。無論如何，無穿無爛又一年lu。
良いお年をお迎えください！
Kommentare