自從學咗日文之後好在意語意，所以經常回想一字一句到底係唔係語言的陷阱(i.e. 係人講我講既語句，但實質上係有價值問題既句子/字眼)。有好幾個係討厭咗非常之耐，又有幾個係近排先覺得好銀耳。
1. 帶
例:
生日我帶你食好野
Exception/正確使用方法:
其中一人對目的地好熟悉/而另一個係無任何概念，如果係共同探索新地方 唔該用返「去」
帶有強烈主動被動性，「帶」同「被帶」。被帶一方變到成個小朋友咁，失去目的同需要被帶，係比較弱勢既角色；經常用嚟美化喺父權主義下的女性—男人強勢女人弱勢，仲配多個女人做事需要輔助，女子無才便是德啊。
同時正因係呢種需要同給予，造成咗兩人之間既差距。被帶一方成功到達目的地既時候要感謝對方既帶領，長久下來就係僵化而單向的感謝與被感謝關係which唔應該適用於情侶間。
Layman d咁講就係：
點解要你帶我去？我自己又唔係唔識去。點解你要喺言談間搶做領導角色？你是唔是想dominate我地段關係。
2. 陪
例:
我陪你食飯
Exception/正確用法:
陪係陪伴既意思，係有主次之分。一個人係有意志有個人傾向去做一件事，而另一個人作為陪伴，係出於好意或被逼，但去做嗰件事既意慾不及前者咁高。
同樣有一個陪人一個被陪。正因意慾不高，陪人者同樣係付出角色，被陪者就係接受施恩角色。「你陪我」更似係有央求之意。不過普遍語法運用正確，無咩太多需要補充。
3. 總之/反正
係無賴，惡霸先會用既字眼。用得呢個字眼就係跳過所有邏輯同道理，直接去到結論既指標。
例：（爭論中）總之你唔好再做。
例二：（教學中）反正呢個plug落呢條formula度就做到答案。
不難發現「總之」後既語句多少都帶命令性，更多既係「下結論」既感覺。一種只在乎結果的既視感，中間經歷咗乜野完全唔重要，因為重點係放落「總之」後既結果。問題係結果/答案從來唔重要，重要既係理解構成問題既過程，由最開始去思考然後避免再次發生。今日你偷食咗人個布甸，叫你唔好再偷食；聽日偷飲人地罐可樂，唔通又要再講？粗暴咁帶領他人跳過所有思考同邏輯達到實際目的，就係無賴先會用既字眼。
4. 我女人/男人 my girl/boy/man/lady
例子不必多講。呢點用詩解釋更佳：
I do my thing and you do your thing.
I am not in this world to live up to your expectations,
And you are not in this world to live up to mine.
You are you and I am I;
If by chance we find each other, it's beautiful.
If not, it can't be helped.
Fritz Perls
仍然視佔有為愛情指標同有如狗公一樣畫地盤咁展示於人前，只能講咁樣既愛情太俗套（笑）
喜愛字眼
1. 去
兩者係平等關係，無話邊個比邊個懂得更多。「去」有探索新環境，體驗之意。由本身熟悉既地方去一個遠既地方。用簡單日文表達就係ここ（對於講話者近
的地方代稱）同 あそこ（對二人都遠的地方代稱），而唔係そこ（對於聽者近的地方代稱）。遠喺呢度並唔係指距離，而係熟悉程度；有幾了解嗰個地方，係mentally close。
（發覺到再補，如果唔係下世都出唔到呢篇。）
Comments