講起LGBTQ+ 即時諗起用網上媒體宣傳既遊行度，一班滿腦子自由思想既後生仔揮動彩虹旗。佢地抱住木結他唱玫瑰少年，温柔咁同所有人講：「生而為人無罪，你不需要抱歉」（因為用字太相似，不得不令我諗起上篇講既太宰治）但呢度直接又坦誠咁話錯的是世界是社會，你無問題。睇叔.叔之前，我就係諗起呢堆野。我地下意識咁將「新思維」當做係我地呢一代先研發既文化，上一輩就全部係異男異女；但又同時相信sexuality係天性嚟，生出嚟就係咁樣，唔係個人選擇。楊曜愷藉由一個經常被同伴忽視既群體出發探討香港對男同性戀者既現況。「香港」呢個元素不斷重覆：除咗有經典代表香港食文化既茶餐廳之後仲有更多樹木植物，用嚟作為過場。香港既landscape architecture不嬲都係神奇既事，人既空間不足之下容納環境/植物係直觀上好難做到的事，但呢堆綠色植物喺香港左zip右zip神奇地同香港融為一體。
先講我熱愛既食文化，電影入面好多情節都係靠食飯去推動：個女宣佈結婚、擺酒、老公老婆既關係、兩個男人的自煮晚餐、呀海同個仔成家人一齊食飯。幾乎家庭就等於坐埋一枱食飯。重點有時喺啲餸度，會斬雞會有蟹食，有時就喺對話度，更準確咁講係喺個氛圍度。食飯既氛圍就係整個家庭既氛圍。所以由喺骨場食飯到兩個男人喺屋企煮飯，其實都係建構緊一種類似家庭既概念。如果可以一齊食飯，而有好既氛圍，咁大概就係一個好家庭了。呢度利用圍埋食飯顛覆咗「家庭」既組成，唔係具體咁由一男一女婚姻組成；而係指緊一種温暖、互相夾餸既感覺同舉動。
如同一般親密得嚟又唔想露骨既鏡頭一樣，叔叔既sexual scene 都用咗經典近鏡去zoom in body features. 望到既唔止係老人既特質，唔係放大佢地既魚尾紋或者肚腩，更多既係作為一個人既皮膚狀態同佢地手臂、雙腿互相交織。呢度既處理手法比起重著「老人」，更多係放落「人」既刻劃。整個畫面其實好撚肉慾，加埋小小輕快跳動既配樂，好似自己就係坐喺側邊咁睇，心跳不自覺咁加速。
楊曜愷喺拍攝上好大部份時間都係將焦點放落人度，背景或唔太重要既人都會blur. 有一幕比較有趣既處理手法係當超仔返屋企未入屋嗰時被議論，整個畫面係模糊的：只有兩個身型瘦削既女人企喺走廊，乜都聽唔到連睇都未必睇得清。但觀眾好清楚知道佢地講緊乜野，什至連聽都唔駛聽，我地已經知可以點回應。同我地日常遇到既事好相似，我地大概知道呢啲聲音令我地唔舒服，但要揾出聲音根源嗎？無辦法。要揾一個明確對象出嚟同佢辯論對質係好難的，呢種存在但又揾唔到源頭既不安感總係會令人異常敏感。呢個都係我遠離連登既原因，太清楚某啲令人作嘔既想法真實存在喺其他人既腦入面，但又無辦法做啲乜野去改變佢或者直接揾佢出嚟鬧返餐，尤其係整個生態都一樣令人作嘔既時候。所以有邊個真實存在既人物（例：某啲指同性婚姻會破壞家庭價值同一男一女婚姻既議員）大放厥詞既時候，我地群起而攻之，呢個人就係其中一個情感outlet同時都係宣傳理念既時候。楊曜愷大概係想營造呢種揾唔到教化對象既不安感。
比起模糊既批評，更令人受傷既係清晰可見既不理會。戲中有一句基本上總結咗香港社會對待同性戀者的態度，由呀海個仔講既：「靜啲啦。」啊海拒絕出席立法會，唔願意喺公眾面前公開自己的性向，佢既考量係唔知點同個仔交代。而臨近電影結尾，呀海喺佢自己房度開咗立法會既短片，短片內容就係佢班朋友講自己作為同志既經歷，呀海有意識咁較大咗聲量，幾乎係要坐喺俾門外既親生仔聽到；呢個已經係佢最勇敢，近乎出櫃既舉動了。呀海手都震埋坐喺床上面等回應，點得嚟既係：「靜啲啦，Grace訓咗啦。」佢唔係唔出聲扮聽唔到，而係清楚無誤咁同個老豆講：「我聽到㗎啦，之不過我唔想理你。唔該你靜啲唔好再煩。」呢個又何嘗唔係社會對LGBTQ+ 社群既回應，但傷人既係，社會係同群體講，而電影係個仔同老豆講。個仔唔係乜野模糊既人，佢係清晰可見的。正正因為係個仔，所以佢清晰可見，講野能被聽見；但竟然講既係同模糊既人講既係無乜差別。呢一點先係最心酸。「靜啲啦」帶咗一種好重既無力感俾觀眾。以前我地天真咁認為有歧視會反感只係因為有偏見，所以好努力咁抺去誤解，話俾全部人聽：性向唔係我選擇的，而係天生的，什至想像現時主流取向變成小眾，希望可以令人理解到社會對不同sexuality既壓迫。但走到今日，問題唔再係誤解誤會，而係社會根本不屑一顧。知道你的痛苦，亦知點樣可以改善，但唔好意思，社會根本唔想理。
תגובות